RZ-Kultur, das Kulturportal im Kreis Herzogtum LauenburgLandeskulturverband Schleswig-HolsteinMuseen in Schleswig-Holstein / Kreis Herzogtum LauenburgKulturnetz Schleswig-Holstein
©arsten Lübbert
Baden an de Basdower Kanalbrüch

von
Horst Eggert



Kategorien
Nautisches; Heiteres; Plattdeutsches


Swömmen leehrt hebbt wü Launborger Kinner in de 1940er/50er Joahrn bi Blume an’n Hohndörper Elvstrand. Mit een Been affstöten, mit de Strömung fix poor Züch mit de Arms, denn müss’n all bien Kumpel sien, de sick dor henstellt harr, ok wenn wü all ’n Sluck Elvwader intus harrn. As dat denn mit dat Swömmen klappt hett, hebbt wü uns ok na’n Kanal wagt, hier wör dat Wader sauberer. Denn wenn wü vonne Elv na Huus kemen, müssen wü uns erst mal den „smeerigen Boart“ affwaschen. Blos de Wegg na de Basdower Brüch wör bäten wiet för uns. Mehrstens sünd wü to Foot dor henlopen, öwer wenn de Luft to Huus rein wör, schnappten mien Broder Rolf un ick uns dat Melkerrad, twee up een Rad un aff güng de Post.

Extra Baadbüxen harrn wü nich, kunn’ sick uns Öllern ok nich leisten för uns, wörn bannich slechte Tieden dormals na’n verlor’n Krieg. Öwer wü harrn je Turnbüxen, se sünd ümmer bäten groot west, denn de wörn glieks up Towachs köfft, öwer dat hett uns dormals nix utmoakt. De annern Kinner harrn ok nich mehr.

Wenn een Kiesmonarch mit sien Schipp antuckert köm, müssen wü an Land, wägen denn Soog. Wenn de Kiesmonarch mit dat sworbeladen Schipp wedder trüch keem, sünd mien jüngsten Bröder Peter un Jürgen, "frech wie Oskar“, mittschipps ranswommen un ruppkladdert. Wenn denn de Käpten ut dat Stüerhuus rutgröl’n dää, sünd se mit’n Köpper wedder rinsprung’n un hebbt sick högt. Eenmol hett he öwer nich grölt. He hett mit’n Smustergrien sien Piep wiedersmöökt un de Jungs hebbt sick bannig wunnert. Later hebbt se erst markt worüm de Schipper grient hett. He harr nämlich de Bordwand frisch teert un dornah seh’n de Jungs nu ok ut. Mit Sand wör versöcht denn Teer afftöschüern. Öwer dordörch wör dat nur noch slimmer. To Huus wör de Rest mit Petroleum affwischt.

Sprungen sünd wü vonne Steenkant ünner de Brüch. As wü bäten mehr Moot harrn, moakten wü uns Oorsbomben ok von dat lütte Gelänner. De grooten Jungs sprüngen mit’n Suldatensprung vonne Brüch. Glieks wör fragt: „Büst up’n Grund koamen?“ Bannig fein antokieken wörn de eleganten Hecktsprüng von’n Brüchboagen. Een kunn dat ümmer besonners good. Dat wör Wilhelm Polanski, he arbeit’ up de Teegelie in Bookhorst. He kladder mit’n Zigarrnstummel up den Boagen, sprüng hendal, un wenn he denn Kopp wedder ut dat Kanalwader steek, klapp he denn Stumpen ut sien’n Mund rut un damp as’n Launborger Raddamper. Dat Kunststück hett he ok sünndaags, to’n Gaudi von de väälen Spaziergängers, von de Launborger Elvbrüch moakt.

Frieswömmen un Sportaffteeken hett uns Lehrer Weiß vonne Albinusschool ok anne Basdower Kanalbrüch affnahmen. As ick later sülms Sportaffteeken affnahmen heff, wör ok ’n öllerige Frau dorbie, de mit öwer 80 Johrn noch dat Sportaffteeken moakt hett. Se vertell mi, dat se ümmer noch jeden Morgen ganz alleen to’n Baden na de Basdower Brüch föhrt. Ick sä to ehr, ob se keen Angst harr, in ehr Öller so ganz allen in’n Kanal. Se över anter mi, wat bäderes kunn ehr doch nich pessiern, wenn se bien Baden ’n Slag kreeg un ünnerglucker.

In uns Kinnertied hebbt wü vääl Baadspoaß an de Basdower Brüch hatt. Ob doar hüt noch welk baadt?

Horst Eggert